இஸ்ரேல்-20 ( தாவீது – இஸ்ரவேலர் பாளையமிறங்கிய வரிசை)

தாவீது -3 (இஸ்ரவேலர் பாளையமிறங்கிய வரிசை)

ஆதாம் கீழ்ப்படியாததால், (சாகவே சாவான்)ஜீவனை இழந்தான். எனவே மனிதன் முழுமையாக கீழ்ப்படிந்து, அதன் மூலம் இழந்த ஜீவனை மறுபடி பெற்றுக்கொள்ளும்படி, தேவன் நியாயப்பிரமாணத்தைக் கொடுத்தார். ஆனால், அப்போதும் மனிதர்களால், கீழ்ப்படிய முடியவில்லை. பொய் சொல்லக்கூடாது என்று தேவன் சொல்லி இருக்க, மனிதன் சுலபமாக பொய் சொல்லி பாவம் செய்து விட்டான். அதை சரிசெய்ய வேண்டுமானால், ஏதோ ஒன்று செய்ய வேண்டும். தேவன், ஆசரிப்பு கூடாரம் என்ற ஒன்றை, மோசேக்கு காண்பித்து, ஆசரிப்பு கூடாரம் அமைத்து, அதில் பலிகள் கொடுக்கச் சொன்னார். அதோடு ஆசரிப்புக்கூடாரம் என்பது, தேவன் வாசம் பண்ணும் இடம். அந்த ஆசரிப்பு கூடாரத்தை வனாந்திர பயணத்தின்போது, தங்கும் இடத்தில், நடுவாக அமைத்து, அதை சுற்றிலும் இஸ்ரவேலரின் கூடாரங்கள் இருக்க வேண்டும் என்று தேவன் கட்டளை கொடுத்தார். சரியாகச் சொல்ல வேண்டுமானால், தேவன் இஸ்ரவேலரின் நடுவே வாசம் பண்ண விரும்பி, அவர்கள் நடுவே வாசம் பண்ணினார்.

7 மோசே கூடாரத்தைப் பெயர்த்து, அதைப் பாளயத்துக்குப் புறம்பே தூரத்திலே போட்டு, அதற்கு ஆசரிப்புக்கூடாரம் என்று பேரிட்டான். கர்த்தரைத் தேடும் யாவரும் பாளயத்துக்குப் புறம்பான ஆசரிப்புக் கூடாரத்துக்குப் போவார்கள்.
8.மோசே கூடாரத்துக்குப் போகும்போது, ஜனங்கள் எல்லாரும் எழுந்திருந்து, தங்கள் தங்கள் கூடாரவாசலில் நின்றுகொண்டு, அவன் கூடாரத்துக்குள் பிரவேசிக்குமட்டும், அவன் பின்னே பார்த்துக்கொண்டிருந்தார்கள்.

யாத்திராகமம் 33:7,8

முதலாவது, மோசே பாளையத்துக்கு புறம்பாக, ஆசரிப்பு கூடாரத்தை நிறுவி, அங்கே போய் கர்த்தருடன் பேசினார். யாத்திராகமம் 33: 7-11ல் மோசே, ஆசரிப்பு கூடாரத்துக்குள் சென்று, கர்த்தருடன் பேசுவது கூறப்பட்டிருக்கும். இந்த ஆசரிப்பு கூடாரத்தில் தான், யோசுவா ஆசரிப்புக் கூடாரத்தை விட்டு பிரியாதிருந்தார். இங்கு தான், மோசேயோடு கர்த்தர் முகமுகமாக பேசினார் என்று பார்க்கலாம்.

யாத்திராகமம் 25:8 அவர்கள் நடுவிலே நான் வாசம் பண்ண, எனக்கு ஒரு பரிசுத்த ஸ்தலத்தை உண்டாக்குவார்களாக.

Tamil Easy Reading Version மேலும் தேவன், “ஜனங்கள் எனக்காக பரிசுத்த பிரகாரத்தை ஏற்படுத்த வேண்டும். அப்போது நான் அவர்கள் மத்தியில் வாழ்வேன்.

தேவன் மோசேயைக் கூப்பிட்டு, ஜனங்கள் நடுவில், நான் வசிக்கும்படி, ஒரு ஸ்தலம் உருவாக்க வேண்டும். நான் உனக்கு காட்டுகிற மாதிரியின்படி மட்டுமே அதை உருவாக்க வேண்டும் என்று கூறினார். அதுதான் ஆசரிப்பு கூடாரம்.

யாத்திராகமம் 39:32 இப்படியே ஆசரிப்புக் கூடாரமாகிய வாசஸ்தலத்தின் வேலையெல்லாம் முடிந்தது; கர்த்தர் மோசேக்குக் கற்பித்தபடியெல்லாம் இஸ்ரவேல் புத்திரர் செய்தார்கள்.

அதற்கு பின்னர்தான், மோசே அந்த வேலைகளை எல்லாம் சரியாக செய்து முடித்தார். ஆசரிப்பு கூடாரத்தை நடுவில் அமைத்து, மற்ற 12 கோத்திர மக்களும் எப்படி அதைச் சுற்றிலும் தங்க வேண்டும் என்பதை, எண்ணாகமம் 2,3 அதிகாரங்களில் கூறி இருக்கிறார். 20 வயது முதல், 50 வரையுள்ள ஆண்கள், ஒவ்வொரு கோத்திரத்திலும் எத்தனை பேர் என்று, தேவன் கணக்கு எடுக்க சொன்ன வேதத்தின் முதல் சென்செஸ் அது.

ஆசரிப்பு கூடாரத்தை ஒட்டி, உடனடியாக வேறு கோத்திர ஜனங்களை தங்க தேவன் அனுமதிக்கவில்லை. ஆசரிப்பு கூடாரத்தை பாதுகாக்கும் பணியை லேவியருக்குக் கொடுத்தார். லேவியர்களான, கோகாத் புத்திரர், கெர்சோன் புத்திரர், மெராரி புத்திரர் மூன்று பக்கங்களிலும், வாசலுக்கு எதிராக, மோசேயும் ஆரோனும் இருக்க வேண்டும். இவர்கள் தான் மற்ற மக்கள் ஆசரிப்பு கூடாரத்துக்கு அருகில் வராதபடிக்கு பாதுகாக்க வேண்டும். இந்த லேவியர்களுமே, ஆசரிப்பு கூடாரத்தில், பரிசுத்த ஸ்தலம், மகா பரிசுத்த ஸ்தலத்திலுள்ள பொருட்களை பார்க்க கூடாது.

கோகாத்தியரின் வேலை

4.ஆசரிப்புக் கூடாரத்திலே கோகாத் புத்திரரின் பணிவிடை மகா பரிசுத்தமானவைகளுக்குரியது.

5.பாளயம் புறப்படும்போது, ஆரோனும் அவன் குமாரரும் வந்து, மறைவின் திரைச்சீலையை இறக்கி, அதினாலே சாட்சியின் பெட்டியை மூடி,

15.பாளயம் புறப்படும்போது, ஆரோனும் அவன் குமாரரும் பரிசுத்த ஸ்தலத்தையும் அதினுடைய சகல பணிமுட்டுகளையும் மூடித் தீர்ந்தபின்பு, கோகாத் புத்திரர் அதை எடுத்துக்கொண்டுபோகிறதற்கு வரக்கடவர்கள்; அவர்கள் சாகாதபடிக்குப் பரிசுத்தமானதைத் தொடாதிருக்கக்கடவர்கள்; ஆசரிப்புக் கூடாரத்திலே கோகாத் புத்திரர் சுமக்கும் சுமை இதுவே. 

எண்ணாகமம் 4

வனாந்திரத்தில், ஒரு இடத்திலிருந்து கிளம்ப வேண்டுமானால், முதலில் மேகம் மேலே எழும்பும். உடனே, ஆரோனும் அவர் குமாரனும், முதலாவது பரிசுத்த ஸ்தலம், மகா பரிசுத்த ஸ்தலத்தின் பொருட்களை மூட வேண்டும். அதன் பின்னர், கோகாத் புத்திரர் அவைகளை, தூக்கி செல்ல வேண்டும். கோகாத் புத்திரர் எந்த பொருளையும் பார்க்க கூடாது. தூக்கி செல்வது மட்டுமே அவர்கள் வேலை.

கெர்சோனியரின் வேலை

24. பணிவிடை செய்கிறதிலும் சுமக்கிறதிலும் கெர்சோன் வம்சத்தாரின் வேலையாவது:

25. அவர்கள் வாசஸ்தலத்துக்கும் ஆசரிப்புக் கூடாரத்துக்கும் உரிய தொங்குதிரையையும், மூடியையும், அவைகளின்மேல் இருக்கிற தகசுத்தோல் மூடியையும், ஆசரிப்புக் கூடாரவாசல் மறைவையும்,

26. பிராகாரத்தின் தொங்குதிரைகளையும், வாசஸ்தலத்தண்டையிலும் பலிபீடத்தண்டையிலும் சுற்றிலும் இருக்கிற பிராகாரத்தினுடைய வாசல் தொங்குதிரையையும், அவைகளின் கயிறுகளையும், அவைகளின் வேலைக்கடுத்த கருவிகள் யாவையும் சுமந்து, அவைகளுக்காகச் செய்யவேண்டிய யாவையும் செய்யக்கடவர்கள்.

அதேபோல, தொங்கும் திரைகள், திரைச்சீலை ஆசரிப்பு கூடார வாசல் மறைவு எல்லாவற்றையும் தூக்கிச் செல்வது கெர்சோன் புத்திரர் பணி.

மெராரியரின் வேலை

31. ஆசரிப்புக் கூடாரத்தில் அவர்கள் செய்யும் எல்லாப் பணிவிடைக்கும் அடுத்த காவல் விசாரிப்பாவது: வாசஸ்தலத்தின் பலகைகளும், தாழ்ப்பாள்களும், தூண்களும், பாதங்களும்,

32. சுற்றிலும் இருக்கிற பிராகாரத்தின் தூண்களும், அவைகளின் பாதங்களும், முளைகளும், கயிறுகளும், அவைகளின் சகல கருவிகளும், அவற்றிற்கு அடுத்த மற்றெல்லா வேலையும்தானே; அவர்கள் சுமந்து காவல்காக்கும்படி ஒப்புவிக்கப்படுகிறவைகளைப் பேர்பேராக எண்ணக்கடவீர்கள்.

மெராரி புத்திரர், பலகை, தூண், தாழ்ப்பாள், வெண்கல பாதங்கள் போன்றவற்றை சுமந்து செல்ல வேண்டும். இது மெராரி புத்திரர் பணி.

இப்படி நேர்த்தியாக, யார் ஆசரிப்பு கூடாரத்தை சுற்றிலும் இருக்க வேண்டும்? யார் எதை சுமக்க வேண்டும் என்பதை தேவன் கூறினார். இவ்வளவு நேர்த்தியாக தேவன் ஆசரிப்பு கூடாரத்தை செய்ய சொல்லி, ஜனங்களின் நடுவில் வாசம் செய்தார். தேவன் ஜனங்களின் நடுவே வாசம் செய்தார் என்பதால், நாம் ஆசரிப்பு கூடாரம் நடுவில் இருந்ததாகவும், ஜனங்கள் அதை சுற்றிலும் வசித்ததாகவும் நினைப்போம். ஆனால், உண்மை அது அல்ல. வேதத்தை ஆராய்கிற வேத ஆராய்ச்சியாளர்கள் சொல்வது என்ன என்றால், கீழ்க்கண்ட படத்தில் உள்ளது போல, அவர்கள் பாளையமிறங்கினார்களாம்.

பொதுவாக, சுற்றிலும் இருந்தார்கள் என்றால், வடக்கு, கிழக்கு திசையில் மட்டுமல்லாது, வட கிழக்கு திசையிலும்(சுற்றி வட்டமாக) இருந்தார்கள் என்று நினைப்போம். அது தவறானது. அவர்கள் ஒருவர் பின் ஒருவராக இருந்தார்கள் என்று வேத அறிஞர்கள் கூறுகிறார்கள்.

சரியாக இப்படித்தான் பாளையமிறங்கியிருக்கிறார்கள். கிழக்கு திசையில், செபுலோன், இசக்கார், யூதா கோத்திரம் இருந்தால், அதற்கு தலையாக யூதா கோத்திரம் இருந்து நடத்தி வந்திருக்கிறார்கள். எனவே யூதா, தாண், ரூபன், எப்ராயீம் என்ற கோத்திரங்கள் தலைவர்களாய் இருந்திருக்கிறார்கள்.  முதலில் எந்த கோத்திரம் செல்ல வேண்டும் என்பது முதற்கொண்டு தேவன் வழி நடத்தி இருக்கிறார் என்பதை கீழ்க்கண்ட வசனங்களில் பார்க்கலாம்.

9.எண்ணப்பட்ட யூதாவின் பாளயத்தார் எல்லாரும் தங்கள் சேனைகளின்படியே இலட்சத்து எண்பத்து ஆறாயிரத்து நானூறுபேர்; இவர்கள் பிரயாணத்திலே முதற்பாளயமாய்ப் போகக்கடவர்கள்.

16. எண்ணப்பட்ட ரூபனின் பாளயத்தார் எல்லாரும் தங்கள் சேனைகளின்படியே இலட்சத்து ஐம்பத்து ஓராயிரத்து நானூற்று ஐம்பதுபேர்; இவர்கள் பிரயாணத்தில் இரண்டாம் பாளயமாய்ப் போகக்கடவர்கள்.

17. பின்பு ஆசரிப்புக் கூடாரம் லேவியரின் சேனையோடே பாளயங்களின் நடுவே பிரயாணப்பட்டுப் போகவேண்டும்; எப்படிப் பாளயமிறங்குகிறார்களோ, அப்படியே அவரவர் தங்கள் வரிசையிலே தங்கள் கொடிகளோடே பிரயாணமாய்ப் போகக்கடவர்கள்.

24. எண்ணப்பட்ட எப்பிராயீமின் பாளயத்தார் எல்லாரும் தங்கள் சேனைகளின்படியே இலட்சத்து எண்ணாயிரத்து நூறுபேர்; இவர்கள் பிரயாணத்தில் மூன்றாம் பாளயமாய்ப் போகக்கடவர்கள்.

31. எண்ணப்பட்ட தாணின் பாளயத்தார் எல்லாரும் இலட்சத்து ஐம்பத்தேழாயிரத்து அறுநூறுபேர்; இவர்கள் தங்கள் கொடிகளோடே பின்பாளயமாய்ப் போகக்கடவர்கள்.

எபிரெயர் 8:5 இவர்கள் செய்யும் ஆராதனை பரலோகத்திலுள்ளவைகைளின் சாயலுக்கும் நிழலுக்கும் ஒத்திருக்கிறது; அப்படியே, மோசே கூடாரத்தை உண்டுபண்ணுகையில் மலையிலே உனக்குக் காண்பிக்கப்பட்ட மாதிரியின்படியே நீ எல்லாவற்றையும் செய்ய எச்சரிக்கையாயிருங்கள் என்று தேவன் அவனுக்குக் கட்டளையிட்டார்.

Tamil Easy Reading Version அவர்கள் புரியும் சேவையானது பரலோகத்தில் உள்ள சேவையின் சாயலாகவும், நிழலாகவும் மட்டுமே இருக்கிறது. அதனால்தான் பரிசுத்தக் கூடாரத்தை மோசே ஸ்தாபிக்கப் போகும்போது தேவன் எச்சரித்தார். “மலையிலே உனக்கு நான் காட்டிய மாதிரியின்படியே நீ ஒவ்வொன்றையும் செய்ய உறுதியாய் இரு” என்று தேவன் சொன்னார்.

தேவன் சொல்லியபடி தான், மோசே ஆசரிப்பு கூடாரத்தை செய்தார். தேவன் கூறியபடி தான், மக்களை, கோத்திரம் கோத்திரமாக பாளையமிறங்கச் செய்தார். நாம் ஏற்கனவே, பண்டிகைகள் பற்றிய பதிவில், இஸ்ரவேலர் எகிப்திலிருந்து கானான் வரும்வரையும் எது செய்தாலும், அது ஒரு தீர்க்கதரிசன செயல் என்று பார்த்தோம். இங்கே, அவர்கள் பாளையமிறங்கி இருந்தது கூட, சிலுவை போன்ற அமைப்பில். பரலோகத்திலிருந்து கீழே நோக்கி பார்த்தால், இஸ்ரவேல் ஜனங்கள் சிலுவை போன்ற அமைப்பில் தான் இருந்திருப்பார்கள்.

நாம் தாவீதையும், உடன்படிக்கை பெட்டியையும் பார்த்துக்கொண்டு வருகிறோம். இடையில், ஏன் இந்த பதிவு என்றால், ஆசரிப்பு கூடாரம், உடன்படிக்கை பெட்டியை தேவன் எவ்வளவு பத்திரமாய் பாதுகாத்து கொண்டு வருகிறார் என்பதற்காகத்தான்.

18.லேவியருக்குள்ளே கோகாத் வம்சமாகிய கோத்திரத்தார் அழிந்துபோகாதபடி பாருங்கள்.

19.அவர்கள் மகா பரிசுத்தமானவைகளைக் கிட்டுகையில், சாகாமல் உயிரோடிருக்கும்படிக்கு, நீங்கள் அவர்களுக்காகச் செய்யவேண்டியதாவது:

20.ஆரோனும் அவன் குமாரரும் வந்து, அவர்களில் அவனவனை அவனவன் செய்யும் வேலைக்கும் அவனவன் சுமக்கும் சுமைக்கும் நியமிக்கக்கடவர்கள்; அவர்களோ சாகாதபடிக்குப் பரிசுத்தமானவைகள் மூடப்படும்போது பார்க்கிறதற்கு உட்பிரவேசியாமல் இருப்பார்களாக என்றார்.

எண்ணாகமம் 4

கோகாத் புத்திரர் பரிசுத்த பொருட்களான, உடன்படிக்கை பெட்டி, குத்து விளக்கு, அப்ப மேசை, தூப பீடம், பலிபீடம், தண்ணீர் தொட்டி, கத்தரி, கரண்டிகள், பாத்திரங்கள் என்று, ஆசரிப்பு கூடாரத்தின் முக்கியமான பொருட்களை தூக்கினாலும், அவைகளை ஆரோன் குடும்பத்தார் மூடும்போது கூட பார்க்க கூடாதாம். பார்த்தால் செத்து விடுவார்களாம். அவ்வளவு பயங்கரமானது உடன்படிக்கை பெட்டி. அதேபோல, அவ்வளவு பரிசுத்தமானது ஆசரிப்பு கூடாரம்.

இந்த ஆசரிப்பு கூடாரத்தை இஸ்ரவேலர், எங்கே வைத்தார்கள்? உடன்படிக்கை பெட்டிக்கு உரிய கனத்தைக் கொடுத்தார்களா? என்பதுதான் வரும் பதிவுகளில் பார்க்க இருக்கிறோம். தாவீது என்ன செய்தார்? ஏன் தாவீது முக்கியமானவர் என்பதையும் வரும் பதிவுகளில் காணலாம்.