இஸ்ரேல்–27 (அசீரிய சாம்ராஜ்யம்)

அசீரிய சாம்ராஜ்யம்

வேதத்தில் இராஜாக்கள், நாளாகமம் புத்தகத்தில், யூதாவின் ராஜாக்கள், இஸ்ரேல் ராஜாக்களைப் பற்றி வரிசையாகக் கூறப்பட்டிருக்கும். இஸ்ரவேல் தேசம், அசீரியர்களின் கையில் ஒப்பு கொடுக்கப்படுவதோடு, இஸ்ரேல் தேசத்தைப் பற்றிய குறிப்புகள் வேதத்தில் முடிந்திருக்கும். ஆனால் யூதா தேசமோ, அதற்கு அடுத்து பாபிலோனுக்கு சிறைப்பட்டு செல்வது, பாபிலோனில் இருந்து மீண்டும் வருவது, என யூதாவைப் பற்றிய குறிப்புகள் வேதத்தில் தொடர்ந்து எழுதப்பட்டிருக்கும். யூதாவின் தலைநகர் எருசலேம். அதைப் பற்றி தொடர்ச்சியாக நாம் காண இருக்கிறோம். முதலாவது பெரிய சாம்ராஜ்யம் அசீரிய சாம்ராஜ்யம். ஆனால் அசீரியர்களால், இஸ்ரேல் தேசத்தை மட்டுமே பிடிக்க முடிந்தது. யூதாவை தொட முடியவில்லை.

1.அசீரிய சாம்ராஜ்யம்

கிமு722ல் அசீரியர்கள், வடக்கு ராஜ்யத்தைப் பிடித்தனர். அசீரியர்கள் மொத்தம் 25 நாடுகளை பிடித்ததாகக் கூறப்பட்டிருக்கிறது. தான் சிறைபிடித்த நாடுகளில் உள்ள மக்கள், கூட்டமாக கலந்து , தங்களுக்கு எதிராக திரும்பக் கூடாது என்பதற்காக அசீரிய ராஜா ஒரு காரியம் செய்தார். 25 நாடுகளிலும் 25 நாட்டு மக்களை கலந்து வாழ வைத்தான். அதாவது, இஸ்ரேல் தேசமாகிய வட தேசத்தை எடுத்துக் கொண்டால், அதில் உள்ள மக்களை 25 பிரிவுகளாக பிரித்து, ஒரு பிரிவை மட்டும் இஸ்ரேல் தேசத்தில் வைத்து விட்டு, மற்ற 24 பிரிவுகளை 24 தேசத்தில் கலந்து வாழ விட்டான். இதே போல மற்ற 24 தேசங்களிலும் இருந்து, ஒவ்வொரு பிரிவு மக்கள் இஸ்ரேலுக்கு வந்தனர்.

எனவே இஸ்ரேல் தேசத்தில் இருந்த இஸ்ரவேலர்கள், தங்களுடன் கலந்த பிற நாட்டு மக்களுடன் சம்பந்தங் கலந்தார்கள். பிற நாட்டு மக்களைத் திருமணம் செய்து, விருத்தசேதனம் செய்து அவர்களையும் இஸ்ரவேலர் ஆக்குகிறார்கள். இதனைப் பார்த்த யூதர்களுக்கு கோபம் வருகிறது.

இஸ்ரவேல் என்பது கர்த்தருடைய தேசம். அங்கே கர்ததருக்கு பயப்படாதவர்கள் குடியேறியதால், சிங்கங்கள் வந்து சிலரைக் கொன்றது. எனவே அசீரியா ராஜாவிடம், இஸ்ரேலின் தெய்வம் பற்றி யாராவது எங்களுக்கு  கற்றுக்கொடுக்க வேண்டும் என்று வேண்டுகோள் வைத்தனர். ஒரு ஆசாரியன் வந்து கற்றுக் கொடுத்தான். அவர்கள், தங்கள் தெய்வங்களையும் வழிபட்டு, கர்த்தரையும் வழிபட்டு, வாழ்ந்தார்கள். தங்கள் தெய்வத்தோடு ஒரு தெய்வமாக, கர்த்தரையும் இணைத்துக் கொண்டார்கள். இதைத்தான் ஆவிக்குரிய விபச்சாரம் என்று கருதினர் யூதர்கள்.

23 கர்த்தர் தீர்க்கதரிசிகளாகிய தம்முடைய ஊழியக்காரர் எல்லாரையும் கொண்டு சொல்லியிருந்தபடி, அவர்களைத் தமது சமுகத்தைவிட்டு அகற்றுகிற வரைக்கும் அவைகளை விட்டு விலகாதிருந்தார்கள்; இப்படியே இஸ்ரவேலர் தங்கள் தேசத்தினின்று அசீரியாவுக்குக் கொண்டுபோகப்பட்டு இந்நாள்வரைக்கும் இருக்கிறார்கள்.

24 அசீரியா ராஜா, பாபிலோனிலும், கூத்தாவிலும், ஆபாவிலும், ஆமாத்திலும், செப்பர்யாயிமிலும் இருந்து மனுஷரை வரப்பண்ணி, அவர்களை இஸ்ரவேல் புத்திரருக்குப் பதிலாகச் சமாரியாவின் பட்டணங்களிலே குடியேற்றினான்; இவர்கள் சமாரியாவைச் சொந்தமாய்க் கட்டிக்கொண்டு அதின் பட்டணங்களிலே குடியிருந்தார்கள்.

25 அவர்கள் அங்கே குடியேறினது முதல், கர்த்தருக்குப் பயப்படாததினால், கர்த்தர் அவர்களுக்குள்ளே சிங்கங்களை அனுப்பினார்; அவைகள் அவர்களில் சிலரைக் கொன்றுபோட்டது.

26 அப்பொழுது ஜனங்கள் அசீரியா ராஜாவை நோக்கி: நீர் இங்கேயிருந்து அனுப்பி சமாரியாவின் பட்டணங்களிலே குடியேற்றுவித்த ஜாதிகள் அந்த தேசத்து தேவனுடைய காரியத்தை அறியாதபடியினால், அவர் அவர்களுக்குள்ளே சிங்கங்களை அனுப்பினார்; அந்த தேசத்து தேவனுடைய காரியத்தை அவர்கள் அறியாதபடியினால், அவைகள் அவர்களைக் கொன்றுபோடுகிறது என்று சொன்னார்கள்.

27 அதற்கு அசீரியா ராஜா: நீங்கள் அங்கேயிருந்து கொண்டுவந்த ஆசாரியர்களில் ஒருவனை அங்கே அழைத்துக் கொண்டுபோங்கள்; அவர்கள் அங்கே குடியிருக்கும்படிக்கு, அவன் அவர்களுக்கு அந்த தேசத்து தேவனுடைய காரியத்தைப் போதிக்கக்கடவன் என்று கட்டளையிட்டான்.

28 அப்படியே அவர்கள் சமாரியாவிலிருந்து கொண்டுபோயிருந்த ஆசாரியர்களில் ஒருவன் வந்து, பெத்தேலிலே குடியிருந்து, கர்த்தருக்குப் பயந்து நடக்கவேண்டிய விதத்தை அவர்களுக்குப் போதித்தான்.

29 ஆனாலும் அந்தந்த ஜாதி தங்கள் தங்கள் தேவர்களைத் தங்களுக்கு உண்டு பண்ணி, அந்தந்த ஜாதியார் குடியேறின தங்கள் தங்கள் பட்டணங்களில் சமாரியர் உண்டுபண்ணின மேடைகளின் கோவில்களில் வைத்தார்கள்.

30 பாபிலோனின் மனுஷர் சுக்கோத் பெனோத்தையும், கூத்தின் மனுஷர் நேர்காலையும், ஆமாத்தின் மனுஷர் அசிமாவையும்,

31 ஆவியர் நிபேகாசையும் தர்தாக்கையும் உண்டாக்கினார்கள், செப்பர்வியர் செப்பர்வாயீமின் தேவர்களாகிய அத்ரமலேக்குக்கும் அன்னமலேக்குக்கும் தங்கள் பிள்ளைகளை அக்கினியில் தகனித்து வந்தார்கள்.

32 அவர்கள் கர்த்தருக்குப் பயந்ததுமன்றி, மேடைகளிலுள்ள கோவில்களில் தங்களுக்காக ஆராதனை செய்கிறதற்கு, தங்களுக்குள் ஈனமானவர்களை ஆசாரியர்களாகவும் ஏற்படுத்தினார்கள்.

33 அப்படியே கர்த்தருக்குப் பயந்தும், தாங்கள் விட்டுவந்த ஜாதிகளுடைய முறைமையின்படியே தங்கள் தேவர்களைச் சேவித்தும் வந்தார்கள்.

41 அப்படியே அந்த ஜாதிகள் கர்த்தருக்குப் பயந்தும், தங்கள் விக்கிரகங்களைச் சேவித்தும் வந்தார்கள்; அவர்கள் பிள்ளைகளும் அவர்கள் பிள்ளைகளின் பிள்ளைகளும் தங்கள் பிதாக்கள் செய்தபடியே இந்நாள்வரைக்கும் செய்துவருகிறார்கள்.

2 இராஜாக்கள் 17: 24 முதல் 41

இஸ்ரவேலில் இருந்த சமாரியர்கள், பிற இனத்தாருடன் கலக்காத யூத ராஜ்ஜியத்துடன் இணைய விரும்பினர். புறஜாதிகளுடன் கலந்ததால், யூதர்கள் இஸ்ரவேலரை ஏற்றுக்கொள்ளவில்லை. இதனால் சமாரியர்கள் தங்களுக்கு என்று ஒரு தோரா(வேதம்) எழுத ஆரம்பித்தார்கள், அதுதான் சமாரியர்களின் பஞ்ச ஆகமம். சமாரியாவின் கெர்சீம் மலையை தெரிந்தெடுத்து தொழுது கொள்ள ஆரம்பித்தார்கள். இதை பார்த்த பின்பு யூதர்களுக்கு சமாரியர் மீது இன்னும் வெறுப்பு வந்தது.

(எருசலேமில் இருந்து கலிலேயா போக வேண்டும் என்றால், சமாரியா தாண்டிப் போக வேண்டும். ஆனால் யூதர்கள் அப்படி போக மாட்டார்கள். எருசலேமில் இருந்து யோப்பா பட்டணம் போய், கடற்கரை வழியே நெகிடோ பள்ளத்தாக்கு போய், கலிலேயா வருவார்கள். அல்லது எருசலேமில் இருந்து எரிகோ பட்டணம் போய், யோர்தான நதி ஓரம் அப்படியே மேலே வந்து கலிலேயா வருவார்கள். (நல்ல சமாரியன் உவமை இப்போது வாசித்துப் பாருங்கள். புரியும்) யூதர்களுக்கு, இஸ்ரவேலர்கள் துரோகிகள், அருவருப்பானவர்கள், பரிசுத்தக்குலைச்சல் ஆனவர்கள்.

இயேசு சமாரியஸ்திரியிடம் பேசும்போது, தன் சீஷர்களோடு கலிலேயா சென்றவர், சமாரியா வழியாக செல்கிறார். யூதர்கள் சமாரியா வழியாக செல்ல மாட்டார்கள். அவரது சீஷர்களுக்கு அது குழப்பமாகத் தான் இருந்தது. இயேசு நேரடியாக சமாரியாவுக்குள் நுழைய முடியாது. அதனால் அந்த சமாரியா ஸ்திரீ வரும் நேரம் பார்த்து, தன் சீஷர்கள் எல்லாரையும் அனுப்பிவிட்டு, அவளுக்காகக் காத்திருக்கிறார். அவள் மூலமாக சமாரியர்கள் அனைவரிடமும் பேசுகிறார்).

இந்த அசீரியர்கள் தாங்கள் சிறைபிடித்துப்போன இஸ்ரவேலரை, எப்படி எல்லாம் கொடுமைபடுத்தினார்கள் என்பதை நம்மால் சிந்தித்துப் பார்க்கவும் முடியாது. அசீரியர் தாங்கள் சிறைபிடித்துப்போன மக்களை எப்படி எல்லாம் கொடுமைப்படுத்தினர் என்பதை களிமண் எழுத்து படிவங்களில் குறித்திருந்தனர். இவை இன்று பிரிட்டிஷ் மியூசியத்தில் உள்ளது. இந்த அசீரியா தேசத்தின் தலைநகர் நினிவே. இந்தப் பட்டணத்தைத் கட்டியவர், நாம் ஏற்கனவே பார்த்த சர்வாதிகாரி நிம்ரோத் தான் (ஆதியாகமம் 10-11,12).

1842ல் நினிவே(அசீரியர்களின் தலைநகரம்) ஆராய்ச்சி செய்த பிரெஞ்சு ஆய்வாளர் அசீரியா மன்னர்களின் கொடுமைத் தன்மையை, கல்வெட்டுகளில் இருந்தும், களிமண் தட்டைகளில் இருந்தும் கண்டுபிடித்தார். அசிரிய ராஜாக்களுக்கு, பிடித்த பொழுதுபோக்கே, மனிதர்களை சித்திரவதை செய்வதுதான். தாங்கள் வெற்றி கொள்ளும் தேசத்து ஜனங்களை கைதிகளாகக் கொண்டு வந்து, அவர்கள் கைகளை வெட்டி, கண்களை குருடாக்கி, நாக்கை அறுத்து, கொலை செய்து ரசிப்பதே அசீரிய மன்னர்களின் பொழுதுபோக்கு. நினிவேயில் சித்ரவதை கூடங்கள் என்று ஏழு இடங்களைக் கண்டுபிடித்துள்ளார்கள்.

அசீரிய மன்னர், அசூர்பானிப்பால், கொடுமையின் ராஜா. அவர் குறிப்பில், “இன்று 400 பேரின் தலையை அறுத்து குவியலாக்கி மகிழ்ந்தேன்” என்றும், “இன்று 700 பேரின் கண்களைத் தோண்டினோம். அவர்கள் மண்டியிட்டு கதறியது என் காதுகளுக்கு இனிய பாடலாக இருந்தது. எனக்கு மகிழ்ச்சியைத் தந்தது” என்றும் எழுதியிருக்கிறார்.

யோனா நினிவே பட்டணத்துக்கு சென்ற சம்பவம் நம் அனைவருக்கும் தெரியும். யோனா இஸ்ரவேலின் ராஜாவாகிய யெரோபெயாமின் நாட்களில் வாழ்ந்தவர் (2இரா 14-25). யெரோபெயாம் காலத்தில் அசீரியாவை ஆண்டவர் சல்மனாசார். இவரது குறிப்பில் கூட, பொழுதுபோக்கு மக்களை இம்சித்து மகிழ்வது என்று கல்வெட்டு காணப்படுகிறது. “அரண்மனையில் சுமார் 14000கைதிகள் கண்கள் குருடாக்கப்பட்டு, விரல்கள் தரிக்கப்பட்டு, காவலில் வைக்கப்பட்டனர்” என்று குறிப்பு கிடைத்துள்ளது. அதனால்தான் யோனா நினிவே பட்டணத்துக்கு போவதற்கு பயந்தார்.

அசீரியர்களின் தெய்வம் இஷ்டார். இதுதவிர அஸ்ட்ராட், அஷாரேட், அஸ்தரோத் என்ற பெயர்களும் இஷ்டாருக்கு இருக்கிறது. பெண்களை கேவலமாக நடத்தி, நரபலி கொடுக்கும் சடங்கு இஷ்டாருக்கு உண்டு.

அசீரியரின் வீழ்ச்சி

யோனா எச்சரிக்கும்போது மனந்திரும்பியவர்கள், அடுத்த 100 ஆண்டுகளுக்குள் இன்னும் கொடுமை செய்ய ஆரம்பித்தனர். யோனாவிலிருந்து 100 ஆண்டுகள் கழித்து, நினிவேக்கு தீர்க்கதரிசனம் உரைத்தவர் நாகூம். அவர் உரைத்து 100 ஆண்டுகள் கழித்து, கிமு 612ல், பெரும் வெள்ளப்பெருக்கால் நினிவே அழிந்தது. தன் மக்கள் எவ்வளவு விலகிப் போனாலும், தேவன் அவர்களுக்காக வழக்காடுவார் என்பது நிரூபணம் ஆகிறது அல்லவா!

முதல் சாம்ராஜ்யமான அசீரியர்கள் கிமு 722ல் இஸ்ரவேலரை சிறைப்பிடித்து சென்று, சித்ரவதை செய்து மகிழ்ந்தனர். மூன்றாம் சாம்ராஜ்யமான மேதியர்கள், கிமு 612ல் நினிவேயை அழித்தனர். நாகூம் உரைத்த தரிசனம் கீழே வாசிக்கலாம்.

8 ஆனாலும் நினிவேயின் ஸ்தானத்தை, புரண்டுவருகிற வெள்ளத்தினால் சர்வசங்காரம்பண்ணுவார்; இருள் அவர் சத்துருக்களைப் பின்தொடரும்.

நாகூம் 1:8

6 ஆறுகளின் மதகுகள் திறக்கப்படும், அரமனை கரைந்துபோம்.

நாகூம் 2:6

நினிவேயில் இரண்டு மதில்கள் இருந்தது என்று ஆய்வாளர்கள் கண்டுபிடித்துள்ளனர். அங்கு கிடைத்த இடிந்து போன கோட்டைச் சுவரை ஆராய்ந்தவர்கள், இரண்டு மதில் சுவர்கள் அதாவது உட்புறச்சுவர், வெளிப்புறச்சுவர் என்று பாதுகாப்பு இருந்ததாக கண்டுபிடித்தார்கள். உட்புறச்சுவர் உயரம் 100அடி, அகலம் 46 அடி. இந்த 46அடி அகல கோட்டையை, கீழிருந்து மேலே சுற்றி சுற்றி ஏறி உச்சிக்கு செல்லும்படியான ராஜபாதை இருந்திருக்கிறது. இந்த 100அடி உயர கோட்டையின்மேல் பயமில்லாமல் ரதம் ஓட்டியிருக்கிறார்கள் அசீரியா ராஜாக்கள்.

நினிவேயின் நடுவே பெரிய நீர் நிரப்பும் குளங்களைக் கண்டுபிடித்த ஆராய்ச்சியாளர், இது உண்டாக்கப்பட்ட காலத்தை கணக்கிட்டால், 5000வருடங்கள் பழமையானது. அதாவது சர்வாதிகாரி நிம்ரோத் காலத்தில் கட்டப்பட்டது என்று கண்டுபிடித்தார்.

மேதியர்கள், அசீரிய மன்னர்களின் பலம் அறிந்து, இரு மதில் கொண்ட கோட்டையைத் தாக்காமல், அந்த குளத்தின் மதகுகளைத் திறந்து விட்டனர். தண்ணீர் கொஞ்சம் கொஞ்சமாக உள்ளே நுழைந்து, நினிவேயை முழுதுமாக மூழ்கடித்து விட்டது.

பிரெஞ்சு ஆய்வாளர் மற்றொரு காரியமும் கண்டுபிடித்தார். முழு நினிவேயும் வெள்ளத்தால் அழிந்தபோது, அரமனையின் ஒரு சுவர் மட்டும் தீயினால் பாதிக்கப்பட்டு இருந்ததைப் பார்த்தார். இதற்கு விடை, மேதிய சரித்திரக் குறிப்புகளில் கிடைத்தது.

“அசீரியாவின் மன்னன் எசெர்ஷெடன் காலத்திலிருந்து மேதிய ராஜாக்களுடன் அசீரியா பல உடன்படிக்கை செய்திருந்தது. அசூர்பானிப்பால் ஆட்சியில் இதெல்லாம் மறுக்கப்பட்டது. அசீரியாவைக் கைப்பற்றி மேதிய ராஜ்யத்தை விரிவுபடுத்த திட்டமிட்ட நாங்கள் கோசேர் ஆற்றின் மதகுகளைத் திறந்து விட்டோம். நினிவே கோட்டைக்குள் வெள்ளம் புகுந்தது. இனி தப்ப முடியாது என்று அசூர், தன் மனைவி, வீட்டார், பணிப்பெண்கள் என்று 150பேரை ஒரு பகுதியில் அடைத்து, தீ வைத்தான், தன்மீதும் தீ வைத்து கொண்டான். ஆனால் அங்கு நுழைந்த எங்கள் வீரர்கள், எரிந்து கொண்டிருந்த அவனை வெட்டிக் கொலை செய்தனர்”

15 அங்கே அக்கினி உன்னைப் பட்சிக்கும், பட்டயம் உன்னைச் சங்கரிக்கும்; அது பச்சைக்கிளிகளைப்போல் உன்னைப் பட்சித்துப்போடும்; நாகூம் 3:15

வேதம் எவ்வளவு உண்மை அல்லவா. தன் ஜனங்களை சித்ரவதை செய்த ராஜாவை, ஆண்டவர் எப்படி தண்டித்து இருக்கிறார் அல்லவா? நாகூமின் தீர்க்கதரிசனம் கிமு612ல் நிறைவேறியது. அசீரிய சாம்ராஜ்யம் அடியோடு அழிந்தது. இன்றும் அவ்வளவு கல்வெட்டுகளும் பிரிட்டிஷ் மியூசியத்தில் உள்ளது.

இஸ்ரவேலரை துரத்தி வந்த எகிப்தின் ராஜாவாகிய பார்வோன் செங்கடலில் மூழ்கினார் என்று பார்த்தோம். இப்போது இஸ்ரவேலின் 10 கோத்திரங்களை சிறைப்பிடித்து சென்ற சனகெரிப் ராஜாவை ஆண்டவர் சும்மா விட்டிருப்பாரா? இஸ்ரேல் பிடிபட்ட போது, யூதாவை ஆண்டது எசேக்கியா ராஜா.

10 மூன்று வருஷம் சென்றபின்பு, அவர்கள் அதைப் பிடித்தார்கள்; எசேக்கியாவின் ஆறாம் வருஷத்திலும், இஸ்ரவேலின் ராஜாவாகிய ஓசெயாவின் ஒன்பதாம் வருஷத்திலும் சமாரியா பிடிபட்டது.

2 இராஜாக்கள் 18:10

13 யூதாவின் ராஜாவாகிய எசேக்கியாவின் பதினாலாம் வருஷத்திலே அசீரியா ராஜாவாகிய சனகெரிப் யூதாவிலிருக்கிற அரணான சகல பட்டணங்களுக்கும் விரோதமாய் வந்து அவைகளைப் பிடித்தான்.

2 இராஜாக்கள் 18:13

எசேக்கியா ராஜா, அசீரியா ராஜாவிடம் மன்னிப்பு கேட்டு, அசீரியா ராஜா கேட்ட வெள்ளி, பொன் எல்லாவற்றையும் தேவாலயத்தில் இருந்து கூட எடுத்து கொடுத்து விடுகிறார். ஆனால் அசீரியா ராஜா, எல்லாவற்றையும் பெற்றுகொண்டு பின்னர் ஒரு பெரிய படையை அனுப்புகிறார். எத்தனை தேசங்களைப் பிடித்திருக்கிறேன். அவர்கள் தேவன் யாரும் என்னை எதுவும் செய்ய முடியவில்லை. இஸ்ரேலையும் பிடித்து விட்டேன். உங்கள் யூதாவையும் பிடித்து விடுவேன் என்று பெருமையாகப் பேசுவார். நம் கர்த்தர், “இஸ்ரவேலின் தேவனையா பேசினாய்? உன் தேவனின் கோவிலிலே நீ செத்துப்போவாய்” என்று தண்டனை கொடுத்து விட்டார். 2இராஜாக்கள் 18,19ம் அதிகாரத்தில் தெளிவாக இருக்கும்.

அசீரிய ராஜாவின் பெருமை

33 ஜாதிகளுடைய தேவர்களில் யாராவது தங்கள் தேசத்தை அசீரியா ராஜாவின் கைக்குத் தப்புவித்ததுண்டோ?

34 ஆமாத், அர்பாத் பட்டணங்களின் தேவர்கள் எங்கே? செப்பர்வாயீம், ஏனா, ஈவாப் பட்டணங்களின் தேவர்கள் எங்கே? அவர்கள் சமாரியாவை என் கைக்குத் தப்புவித்ததுண்டோ?

35 கர்த்தர் எருசலேமை என் கைக்குத் தப்புவிப்பார் என்பதற்கு, அந்த தேசங்களுடைய எல்லா தேவர்களுக்குள்ளும் தங்கள் தேசத்தை என் கைக்குத் தப்புவித்தவர் யார் என்கிறார் என்று சொன்னான்.

2 இராஜாக்கள் 18:35

தேவனின் பதில்

22 யாரை நிந்தித்துத் தூஷித்தாய்? யாருக்கு விரோதமாய் உன் சத்தத்தை உயர்த்தினாய்? நீ இஸ்ரவேலின் பரிசுத்தருக்கு விரோதமாயல்லவோ உன் கண்களை மேட்டிமையாக ஏறெடுத்தாய்?

2 இராஜாக்கள் 19:22

32 ஆகையால் கர்த்தர் அசீரியா ராஜாவைக்குறித்து: அவன் இந்த நகரத்திற்குள் பிரவேசிப்பதில்லை; இதின்மேல் அம்பு எய்வதுமில்லை; இதற்குமுன் கேடகத்தோடே வருவதுமில்லை; இதற்கு எதிராகக் கொத்தளம் போடுவதுமில்லை.

2 இராஜாக்கள் 19:32

37 அவன் தன் தேவனாகிய நிஸ்ரோகின் கோவிலிலே பணிந்துகொள்ளுகிறபோது, அவன் குமாரராகிய அத்ரமலேக்கும் சரேத்சேரும் அவனைப் பட்டயத்தினால் வெட்டிப்போட்டு, ஆரராத் தேசத்திற்குத் தப்பி ஓடிப்போனார்கள்; அவன் குமாரனாகிய எசாத்தோன் அவன் பட்டத்திற்கு வந்து அரசாண்டான்.

2 இராஜாக்கள் 19:37

அசீரியா ராஜாவாகிய சனகெரிப், அவன் தேவனுடைய ஆலயத்தில், அவன் சொந்தக் குமாரர்களாலேயே வெட்டிக் கொல்லப்பட்டான். தேவன் நியாயம் செய்தார். இன்று நமக்காகவும், நம் அப்பா, வழக்காடுகிறவராகவும், யுத்தம் செய்கிறவராகவும் இருக்கிறார். நாம் அவரைப் புரிந்து கொண்டோமா?

இரண்டாவது பெரிய சாம்ராஜ்யம் பற்றி அடுத்த பதிவுகளில் தொடர்ச்சியாக காணலாம்.